14.
玻璃樽應聲碎裂。
個頭好痛，真係好痛。平生都未試過痛成咁。
我向後跌，面具人立即起身，一個膝撞撞落我塊面度。
我感覺到面罩發出裂開既聲音，但仲未爛開。
「一切都係因為你！」面具人再叫多次，係唔知邊度拎左支哥爾夫球桿出黎，一野打落我度。
「我屋企好有錢，由細到大都比人讚係天才同有正義感；會考三十分，比人叫我理科神童！」
佢繼續揮舞個支桿。我冇力還手，比佢打出房外。
「港大一級榮譽畢業，入去科研公司做，月入十萬，前途無限！」
球桿向我下腹一刺，將我隊落樓梯。
「就係因為你出現！」
佢一躍而下，同時揮擊，就算我已經用鐵通擋住，依然比佢一野打到跪低。
「我只係想學你，做一個好似你咁既英雄！」
今次，我真係愕然至極。
「我想學你咁打擊罪惡，用我既財力、我既技能、我既方法！所以我戴住面具，自製炸彈去炸個班黑幫！」
佢不斷用球桿將我向下壓，我同佢繼續角力。
「點解佢地反而會推舉我做首領！點解呀！果個假騎士單野，我根本野都未講完，班友就開槍打死佢！仲拍片寄埋去電視台！點解呀！」
佢一腳伸我埋牆。
「點解你就做到大英雄，受萬民敬仰；我就無論點做，都比人一步一步推向罪惡既深淵之中！點解個天要咁玩我！」
佢高舉球桿，準備揮出最後一擊。
「我知道……我知道你唔需要知我係邊個，同樣我都唔需要知你係邊個。」
冇錯。
「我係面具人，你係騎士，命運決定左係咁，我地只可以主動去面對佢！」
冇錯！
「騎士係我夢想既縮影，咁我就要親手毀滅呢個夢想，無論用咩方法！」
佢向我既頭施予重擊！
黑影一閃！
我雙手捉住球桿！
面具人一愕，今次到我一腳伸落佢度，搶走佢支球桿。我再一個右勾拳，將佢打落樓梯，跌左落下一層。
我跳落去，佢好快已經企返起身，不過未企穩腳步，我已經又再一拳打落佢度。
天意，命運……
我已經講厭左呢啲名詞。
我誓估唔到，面具人所做既一切，係因為想做英雄。
係因為騎士。
咁係咪代表，一切都係因為我，而令件事變成呢個局面呢？
我唔知道，我真係唔知。
我既拳頭冇停落黎，繼續揮向面具人。
睇住佢比我毆打既身影，我胸口卻感到比佢所既傷更加既難受。
我想做賊，陰錯陽差成為英雄。
佢想做英雄，陰錯陽差成為賊。
其實我地都係比個天玩緊既傀儡，冇辦法掙脫，亦唔能夠改變現況。
呢個世界，又有邊個唔係一樣？
大家都一樣。
每一日起身做既，唔一定係自己想做既事；對住既，唔一定係自己想對既人。
地底泥夢想一步登天。
有錢佬卻可能想過平凡簡單既生活。
但係又有邊個能夠擺脫自己既命運，步入理想既世界？
面對無可奈何既事，即使用盡所有辦法，又有邊個可以將其扭轉？
你的拳頭唔係注定用黎打劫既話，你一蚊都唔會搶到。
嗯，大家都一樣。
活在當下，世人都係一樣。
比我打緊既，係面具人。
係蒙面人。係搞事MK。係賊仔。
係包租婆。
係阿福。
係女神。
係騎士。
係韋欣。
我捉住佢。舉起既拳頭，已經停左落黎。
夠喇。
我唔想再打你喇。
我放手，面具人跌左落地。
佢面具之下，鮮血從下巴唔停咁流出。
而我亦感覺到，由我比佢爆樽個下開始，血已經係面罩流出我既臉頰。
面具人突然係褲袋，拎左一個細啲既搖控出黎！
「喂！」
我想喝止，但係點都唔會快過佢禁掣。
佢禁掣既同時，我聽到遠處傳黎兩聲巨響，地板傳黎兩下跳動。
佢真係引爆左炸彈。
何必咁樣……
佢跪係地下，大笑起上黎。
「哈哈哈！你之前冇講錯！個三個人的確唔係普通市民，而係黑幫高層！呢家佢地一次過死晒喇！連埋我個啲看住佢地既蒙面手下，都一齊炸死晒喇！哈哈哈！所有惡勢力都陷家剷！我係大英雄！你亦救唔到佢地！哈哈哈！哈哈……」
佢依然跪係地下，只係身體已經軟弱無力咁向後挨落牆度。
我知道，呢個係佢對個天既最後一次垂死掙扎同反擊。
我聽講過，一個人殺人之後，靈魂就會被撕裂。
佢一下子殺左咁多人，大概佢既靈魂已經被撕裂成數唔盡既碎屑。
我都跪到佢既前面。
「真係咁好笑？」我問，「等我講啲仲好笑既野你聽。」
佢望住我。
「其實我第一次做騎士，係想打劫呢到果個包租八婆。」
我地眼神係空中交接，不過中間已經乜野都冇。
我地笑了。
大笑起黎。
「哈哈哈……」
我地笑到嘶聲力竭。
面上既血繼續唔停咁流。
而血裡面，夾雜住我地既眼淚。
夾雜住一種無言既控訴。
笑聲傳遍整層樓，整棟唐樓。
笑聲穿過差佬衝上樓既腳步聲，穿過樓下既警車聲同警鳴。
穿過外面混亂既人群，穿過不遠處既兩縷硝煙。
穿過呢個落寞無色既城市。
笑聲圍繞住天空盤旋，俯瞰呢個就係咁戇鳩既世界。
